Bartzelonako Palau Sant Jordi euskaraz kantatzen jarri du Fermin Muguruzak

Naiz ➝

Palau Sant Jordi bete zuten 15.000 lagunek euskaraz kantatzen jarri zituen Fermin Muguruzak ostiral gauean Bartzelonan eskaini zuen kontzertuan. Aretoa, lepo; eta ‘lehoi asmatikoak’ Katalunian beti jaso duen maitasuna sentitu zuen. Hurrengo hitzordua, otsailaren 15ean, Madrilen.  

Iazko abenduaren 17an Biarritzen abiatu eta urriaren 4an Iruñean helmuga izango duen 40. urteurreneko nazioarteko biran sartuta dago buru-belarri Fermin Muguruza. Hamaika urtez nazioarteko birarik egin gabe egon ostean, errepidera itzuli da artista irundarra, 40 urteko ibilbide musikala errepasatuko duen mundu bira batekin.

Hainbat hitzordu ditu lotuta: Paris, Dublin, Txileko Santiago, Bogota, Erroma edo Tokion joko baitu hurrengo hilabeteetan.

Atzo, Bartzelonako Sant Jordi Palau-n eskaini zuen kontzertu jendetsu, bero eta, zergatik ez, hunkigarriak argi utzi zuen zerbait: ‘lehoi asmatikoa’ ikusteko gosea zegoela Katalunian, belaunaldi erreibindikatzaile baten soinu bandaren parte garrantzitsua baita. Esaterako, bideoan ikusten den legez, aretoa euskaraz kantatzen jarri zuen Kortaturen kanta mitiko batekin: ‘Sarri, Sarri’.

«Eskerrik asko Bartzelona. Próximo salto, Madrid», idatzi du gaur Fermin Muguruzak bere sare sozialetan. Bira honetan musikari irundarrak emango duen kontzerturik jendetsuenetako bat izan daiteke Bartzelonan atzo eman zuena, datorren otsailaren 15ean Madrilen eta ekainean Donostiako Anoeta estadioan emango dituenekin batera.

Madrilgo hitzorduan ‘cumbiatón’ feminista lantzen duen madrildar Tremenda Jauría taldea izango du lagun oholtza gainean. 

Lire l’article original