El synth post-punk euskaldun aporta esti vienres a Uviéu col conciertu de Nakar

Música Asturiana ➝

El cuartetu donostiarra qu’entemez punk, electrónica y compromisu políticu actúa en Lata de Zinc enantes de telonear a Fermin Muguruza

Sintetizadores y demás ‘cacharrinos’, guitarra eléctrica, voz con munchu remangu y actitú a esgaya. Amás d’esto orixinalidá, compromisu políticu, esperiencia y una etiqueta p’axuntalo too: synth post-punk. Asina ye Nakar, una de les formaciones nueves euskaldunes que más sonadía tán algamando nos meses últimos y qu’esti vienres 14 de marzu actúen n’Uviéu, en Lata de Zinc. La cita ye les 21.30h, tien un preciu d’entrada de 8 euros y forma parte de la programación d’Artistas en Ruta, circuitu de música en vivo sofitáu pol Ministeriu de Cultura, la Comunidad de Madrid, la Generalitat de Catalunya y Etxepare, institución del gobiernu vascu pa esportar la música n’euskera.

Nakar sorprendieron a muncha xente cuando salieron interpretando un tema homónimu nel programa B ALDEAko BEHEKALDEA de Gaztea, canal de la radiotelevisión pública vasca empobinada a la mocedá. La so propuesta foi novedosa dafechu y a partir d’ehí fueron aportando unos conciertos onde xorrez la enerxía que llibera’l cuartetu donostiarra. Pesie a la so mocedá, los componentes yá tienen veteranía nesto de tar enriba d’un escenariu; asina ye como la tamién actriz -gallardonada con un Goya a Mejor Actriz Revelación pola película Ane– Jone Laspiur cantó en Koban; Xalba Ramirez tocó en Raitx, Physis versus Nomos…; Andoni Olaetxea en Pelax, Zozo, Burrundaria…; y Jokin Azpiazu n’OLOR, Occhi di Farfalla, PAM…

Musicalmente beben del punk, de la electrónica, del techno, del spoken word… y dan cuenta d’ello nos dos trabayos que tienen publicaos: Lore Ta Laban (2023) y Epelkeriaren Kontra (2024). Otros de los pegoyos del so proyectu son l’autoxestión y un marcáu discursu políticu. Esto refléxase en que nun tán dientro de nenguna de les axencies de management nin discográfiques que formen la bayurosa industria musical vasca; en que refugaron tocar en festivales como’l prestixosu BBK Live por nun compartir el so modelu de «macrofestival» y en que les lletres de calter social y políticu tán presentes nos sos temes, como cuando canten «Baina guk mundu berri bat daukagu bihotzean» garrando la mítica frase de Durruti «llevamos un mundu nuevu nos nuestros corazones».

Teloneando a Fermin Muguruza

El conciertu del vienres en Lata de Zinc ta dientro del tour que Nakar fai esti fin de selmana. Amás del conciertu n’Uviéu, el sábadu toquen en Compostela, nel Multiusos Fontes do Sar, acompañando a Fermin Muguruza na xinra internacional que ta faciendo pa festexar 40 años de trayectoria. El conciertu na capital del país ye una oportunidá pa ver de cerca a ún de los nomes más interesantes de la escena euskaldun d’anguaño.